قىرعىزستاننىڭ ەكس-پرەزيدەنتى المازبەك اتامبايەۆ 8 تامىزدا ۇستالعاننان كەيىن كەشە اباقتىنىڭ ار جاعىنان جۇرتشىلىققا قول بۇلعادى دەپ جازادى Qamshy.kz اقپارات اگەنتتىگى.  بۇل تۋرالى قىرعىزدىڭ kg.akipress.org اقپارات اگەنتتىگى حابارلادى.

اتاپ وتەر بولساق، كەشە ۇلتتىق قاۋىپسىزدىك كوميتەتىنىڭ عيماراتىندا بىشكەك قالالىق سوتىنىڭ كوشپەلى وتىرىسى وتكەن. ۇلتتىق قاۋىپسىزدىك كوميتەتىنىڭ عيماراتىنا كەلگەن اتامبايەۆتىڭ جاقتاستارى ونى تەرەزەنىڭ الدىنان بايقاپ العان. ەكس-پرەزيدەنت جينالعان ءبىر توپ ادامدارعا قاراپ قول بۇلعاعان.

ەسكەرتە كەتەيىك، قازىرگى ۋاقىتتا اتامبايەۆقا ايىپ تاعىلىپ، وعان قاتىستى سوت الدى تەرگەۋ جۇمىستارى ءجۇرىپ جاتىر.

ەكس-پرەزيدەنتتى كورۋگە ونىڭ زايىبى رايسا اتامبايەۆا مەن ونىڭ ۇلى قادىر دا بىرگە ەرىپ كەلگەن. ءبىراق ولار المازبەك اتامبايەۆتى كورە العان جوق. تەك ولار ەكس-پرەزيدەنتتىڭ قول بۇلعاعانىن  عانا  بايقاعان. بۇل بەينەكورىنىستى اپرەل تەلەارناسىنىڭ جۋرناليستەرى ءتۇسىرىپ العان كورىنەدى.

ايتا كەتەيىك، المازبەك اتامبايەۆ 8 تامىز كۇنى قوي-تاشتاعى ۇيىندە قولعا تۇسكەنى بەلگىلى. ونىڭ جاقتاستارىمەن اتىس بارىسىندا ءبىر ادام قازا تاۋىپ، بىرنەشە كىسى جارالانعان. ءقازىر اتامبايەۆتى قاماۋ مەرزىمى 26 قازانعا دەيىن ۇزارتىلدى. بۇگىندە تەرگەۋ امالدارى جۇرگىزىلۋدە.